SEVGİ İLAHİ
PAYIDI
Gözəllər məni sevirlər,
Sən bunu dərd eləmisən.
İndiyəcən neçə mərdi
Qovub, namərd eləmisən.
Tanrı qüvvə verən qolu
Pəhləvanlar bükə bilməz.
Sevdayla dolu qəlbimə
Xəbislik üzükə bilməz.
Heç zaman göz dikməmişəm
Bir kimsənin qismətinə.
Baş əymişəm gözəllərin
Namusuna, ismətinə.
Qəlbim sevgi vağzalıdı,
Taleydən özgə payım var.
Başım üstə gülümsəyən
Nə qədər nurlu ayım var.
Bir şey başa düşəmmədin
Sən şeirimi höccələyib.
Neçə-neçə qərib sevda
Ürəyimdə gecələyib.
Gözəllər ac arılardı,
Ürəyim bir gül ləçəyi.
Nəfəsimlə isitmişəm
Neçə üşüyən çiçəyi.
Qismət Ulu Tanrınındı,
Zor ilə pay alammazsan.
Özünü öldürmə, kişi,
Sən mənə tay olammazsan!
Neçə-neçə əsrlərin
O başından gəlir səsim.
Bir ilahi məhəbbətlə
Yoğrulub ruhum, nəfəsim.
Məndə babam Nəsiminin,
Füzulinin qüruru var.
Sözümdə Tanrı işığı,
Nəfəsimdə Haqq nuru var.
Mənim yerişimi gedib,
Həyatını zay eləmə.
Çəkib yırtıq dağarcığı
Çuvalıma tay eləmə!
İnsan var-dövlətiylə yox,
Məhəbbətiylə böyükdü.
Dəvə necə kiçik olsa,
Dərisi ulağa yükdü…
Sevgi İlahi payıdı,
Nə günahım axı mənim?!
Qəlbin təmizlənsin deyə,
Bir şeirimi oxu mənim!
08.10.2001Müəllif: Rafiq YUSİFOĞLU,
şair, Əməkdar mədəniyyət işçisi, filologiya elmləri doktoru, professor.
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru