Doğum Günü
Sənli arzularım Tanrıya ibadət kimidir,
bütün qəlbimlə
dua edirəm, gözləyirəm,
Göz yaşlarımı
Mələklərdən gizləyirəm,
Tanrı isə hələ də susur…
Sənli yuxularım
səadət kimidir,
Heyif ki, gözlərimi açanda xoşbəxtlik məndən küsür,
Sənsizlik ruhumu üzür…
Harda ad günü tortu görsəm
Sənlə birlikdə
heç vaxt tutmadığımız arzumuzu,
heç vaxt üfürmədiyimiz şamları xatırlayıram…
Biz ancaq
dodaqlarımız danışanda
gözlərimizi yummuşuq,
bəlkə ona görə bəxtimiz kor olub,
Bəlkə ona görə
gecələri yuxumuz ərşə çəkilir,
Elə bil yastığımıza qor dolub.
Eh! Bizdən küsən fələk,
Biz səndən nə ummuşuq?!
Ay adı dilimdə düyünlənib
Dodaqlarımda əsir olanım,
Əsarətin mübarək…
Bu dünyaya göz açmaq
hər oğulun işi deyil,
Cəsarətin mübarək…
Hələ dənizin tən ortasındasan,
Limana çox var…
Qarşıda saysız fırtınalar, tufanlar,
Dəryada nəhəng balıq udanlar…
Ay mənim
boz dünyadakı göyqurşağım,
Doğum günün mübarək!
MÜƏLLİF: TURAN NOVRUZLU
Oxuyun >> Gözündə tük var
Zaur Ustacın şeirləri haqqında