Gürcü yazıçısı, “Armudlu düzəngahı” romanının müəllifi Nana Ekvtimişvili və Azərbaycan yazıçısı Kənan Hacı Bakıda Kitab Sərgisində. (Bakı – noyabr 2023) .
Foto: Əli Rzazadə (Ali Rzazade)
Hazırladı: Tuncay Şəhrili
“YAZARLAR” – SİFARİŞ ET
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
Səni xəncərlədi doğma adamlar,
Yadlar son səhnəni alqışladılar.
Oğurluq adamlar, yağma adamlar
Çiçək əvəzinə, çələng yerinə
Bir ovuc göz yaşı bağışladılar,
Ruhuna fatihə…
Qəbrinə torpaq,
Ömrünə başdaşı bağışladılar.
Sonra qatilini çıxarıb başa
Dedilər: Nə gözəl gülur bu adam.
İlahi, nə gözəl bitir tamaşa,
İlahi, nə gözəl ölür bu adam…
Ölür…
Sonsuzluğa sönür gözləri –
Son sözü, yarımçıq sətiri qalır.
Məzarı üstündə ayaq izləri –
Qara sevdaların çətiri qalır.
Qopur xatirələr ox kimi yaydan,
Çökür qaranlığa qurğuşun kimi…
Ayrılıb bir yolluq küydən, haraydan
Ölümlə sevişir son qurşun kimi…
Əlvida…
Yaxşı yol qəmdən, kədərdən…
Yol bitir,
Sonuna bir anlıq qalır.
Səni də silirəm xatirələrdən
Yerində bir ovuc qaranlıq qalır.
Bakı, 25 mart 2023-cü il.
Müəllif: Elçin Mirzəbəyli
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
PAYIZ OLUR AYRILIĞIN SƏHƏRİ
Qəm qoşunu hücum çəkir üstünə,
Viran qoyur könlündəki şəhəri.
Dəyişilir dünəninin havası,
Payız olur ayrılığın səhəri.
Ürəyində dərd özünə yer alır,
Ağ vərəqlər misra-misra qaralır.
Yaşıl-yaşıl arzuların saralır,
Payız olur ayrılığın səhəri.
Eşq sarayın kətpic-kərpic sökülür,
Cismin həsrət bələyinə bükülür,
Budaq-budaq yarpaqların tökülür,
Payız olur ayrılığın səhəri.
Xəyalında ocaq-ocaq yanırsan,
Öz odunu, öz közünü danırsan.
Yazı, yayı keçib getmiş sanırsan,
Payız olur ayrılığın səhəri.
Canın zəmi, səbir dəndi, dözüm dən,
Bulud-bulud yağış yağır gözündən.
Təşnə quşlar su içirlər izindən,
Payız olur ayrılığın səhəri.
Müəllif: Qəzənfər Məsimoğlu
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
SEVGİ YAĞIŞI
Hanı mənim sənli dünyam?
Hanı mənim gözəl anım?
Odum sönüb közüm qalıb,
Çətin daha bir də yanam.
Hanı kövrək baxışların?
Hanı yağan göz yaşların?
Çox dəyişdi zaman bizi
Çətin nağıla inanım
Hanı sənlə qurduğumuz,
Kasıb koma,isti ocaq?
Hanı qoşa şəkillərdə ,
Lal məhəbbət qucaq-qucaq.
İndi sönən ümidlərin
Soyuq külü mənə bəsdir
İndi məni yaşadan da,
O günlərdən qalan səsdir.
Hanı göydən dərdiyim Ay?
Hanı o eşq,o hay- haray?
Qaytar mənə saf sevgimi,
Budur ömrümə düşən pay.
Hanı sənə baxdığım göz?
Hanı mənə verdiyin söz?
Özün mənə deyərdin ki…
Ədama döz,nazıma döz.
Hanı həsrət dolu baxış?
Ömrümüzdən keçsin bu qış
Gəlsin yenə bahar ətri
Çiçək-çiçək yağsın yağış.
AŞİQ OLDUM
Sənə baxan gözlərimdən,
Qəlbimdəkin duydunmu heç?
Ürək qıran sözlərindən,
Söylə görüm doydunmu heç?
Eşqim sənə namə yazdı,
Oxudunmu sözlərimi?
Şıltaqlığın dedim azdı
Çəkəmmədim gözlərimi.
Ömrümüzdən ləçək-ləçək,
Solub düşən günü sana
Bu taleyi bir də seçək
Aşiq olum bir də sənə.
KÜSMƏDİM
Salxım-salxım arzularla yaşaram,
Dözə-dözə dərd içimdə daşaram,
Coşa-coşa şeirləri qoşaram,
Tanrı yazan taleyimdən küsmədim.
Ləçək-ləçək ümidlərim solanda,
Damla-damla gözümə yaş dolanda,
Neçə-neçə istəklərim qalanda,
Tanrı yazan taleyimdən küsmədim.
Gülə-gülə,gilə-gilə ağladım,
Bilə-bilə, ürəyimi dağladım,
Bölə-bölə sevincimi, çağladım,
Tanrı yazan taleyimdən küsmədim.
Əsə-əsə yaşamadım ömrümü,
Küsə-küsə yaşamaq da ömürmü?
Qorxa-qorxa heç demədim sözümü,
Tanrı yazan taleyimdən küsmədim.
BU DÜNYA
Fikir adamıyam,söz adamıyam
Tanrının bəndəsi öz adamıyam
Mən ki bu dünyanın düz adamıyam,
Bildim mənlik deyil, mənlik bu dünya
Mənə yapışamaz nə böhtan,nə şər,
Beləcə, yaranıb əzəldən bəşər,
Daşım şeytanının başına düşər,
Demək mənlik deyil, mənlik bu dünya.
Səbrimin üstünə səbr caladım,
Yuvamı qorudum, ocaq qaladım,
Kimsənin haqqını kəsən olmadım
Güldüm, mənlik deyil, mənlik bu dünya.
Sinəmə sıxdığım sazı gözlədim,
Qışdan sonra gələn yazı gözlədim,
Yoluma nur səpən sözü gözlədim,
Vallah, mənlik deyil, mənlik bu dünya
Dəvəsini süzdüm, tazıya baxdım,
Ağlıyla öyünən razıya baxdım,
Alnıma yazılan yazıya baxdım,
Gördüm mənlik deyil, mənlik bu dünya.
BU GÜN
Yarpağı saralan,küləyi coşan,
Dərəsi dillənən,çayları daşan,
Dağına ,daşına nəğmələr qoşan
Bağrıma basıram payızı bu gün.
Tanrı nəfəsinin ruhunu duyan,
Əlini köksünün üstünə qoyan,
Dünyanın malından gözləri doyan,
Bağrıma basıram payızı bu gün.
Təndirin həniri ,sobanın közü,
Ardınca səsləyir qışın sərt üzü,
Bəxtmə yazılan o qara gözü,
Bağrıma basıram payızı bu gün.
Haramı dadamaz halalın biri,
Əzəldən bilinməz dünyanın sirri
Məclisdə tanınar insanın yeri,
Bağrıma basıram payızı bu gün.
Hiyləgər adamın işi kələkdi,
Etdiyin əməli yazan Mələkdi,
Kəfən doğulandan bizə bələkdi,
Bağrıma basıram payızı bu gün
Müəllif: Mübariz Ağaxan oğlu Süleymanlı,
Şair .
MÜBARİZ SÜLEYMANLINLN YAZILARI
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
LAÇIN-100 ƏDƏBİ ANTOLOGİYA
Nazim Əhmədli
Nazim Şamil oğlu Əhmədli 1 may 1953-cü ildə Laçın rayonunun Əhmədli kəndində anadan olub. 1979-cu ildən şeirləri respublika mətbuatında çap olunur. 1986-cı ildə Moskvada A.M.Qorki adına Ədəbiyyat İnstitutunun poeziya fakültəsini bitirib. On səkkiz kitab müəllifidir, bu kitablardan altısı xarici ölkələrdə – Almaniya, Türkiyə, İran (Təbriz), Özbəkistan, Qazaxstanda və ingilis dilində (Bakıda) nəşr olunub.
Həsrətin çox ağırdı
Qəfil döyüldü qapım,
kimsə məni çağırdı;
dağların arasından,
qara sular axırdı;
bir də hacan açar dan,
xəbər yoxdu carçıdan;
qaranlıqlar saçımdan,
ulduzları sağırdı;
bu nağılı kim yazıb,
yazıb alnımdan asıb;
cığırları ot basıb,
yollar çuxur-çuxurdu;
ağ buludlar ağ papaq,
ömür-gün yarpaq-yarpaq;
gəl, ovcumu açım bax,
içi cığır-cığırdı;
harda batdım günaha,
hələ çox var sabaha;
dizlərim əsir daha,
həsrətin çox ağırdı.
Mənbə: İlham QƏHRƏMAN
MƏLUMATI HAZIRLADI: TUNCAY ŞƏHRİLİ
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
Hazırda yaradıcılıqla məşğul olan yazıçıların təxmini
S İ Y A H I S I
XAÇMAZ – QUSAR –
QUBA – Qvami Məhəbbətoğlu, Murad Muradov
ŞABRAN – SİYƏZƏN – XIZI –
SUMQAYIT – Varis, Akşin Xəyal, Rəna Təbəssüm
SUMQAYIT, ABŞERON, BAKI, ŞİRVAN – burda yaşayanları öz bölgələ-ri ilə qeyd edirəm.
SALYAN – Naibə Yusif
NEFTÇALA – Eluca Atalı, Səhər Əhməd, Xuraman Zakirqızı
BİLƏSUVAR –
CƏLİLABAD – Meyxoş Abdullah, Əzizağa Elsevər, Camal Zeynaloğlu,
Ziya Alar, Sülhiyyə Musaqızı
MASALLI – Nurəddin Ədiloğlu, Damət Salmanoğlu (daha çox şair
kimi tanınır), Əli Rzazadə (daha çox şair kimi tanınır)
YARDIMLI – Aslan Quliyev
LƏNKƏRAN – Qafar Cəfərli, Hafiz Mirzə, Səyavuş Süleymanlı, Eldar
Tahirov, Salman Məmmədoğlu, Eldar İlqaroğlu, Gülər Eldarqızı
LERİK – Etibar Muradxanlı, Elbrus Kəlbiyev
ASTARA – İlham İlhami, Kamran Nazirli
ŞİRVAN – HACIQABUL –
SABİRABAD – Rəqibə Qəvvas, Azər Qismət
SAATLI –
İMİŞLİ – Səyyad Aran
BEYLƏQAN – Mübariz Örən
FÜZULİ – Elçin Əfəndiyev, Seyran Səxavət (bir vaxtlar şair kimi tanı-nıb), Almaz Ərgünəş
CƏBRAYIL – Elçin Hüseynbəyli, Əlisahib Əroğul, Ataqam, Fazil Gü-ney, Nəriman Mahmud, Qorxmaz Abdulla, Əlibala Zalov
ZƏNGİLAN – İmamverdi İsmayılov (daha çox Millət Vəkili kimi tanı-nır), Azad Qaradərəli, Alı Rəhimoğlu, Ayaz İmranoğlu (daha çox şair kimi
tanınıb), Teyfur Çələbi (daha çox şair kimi tanınıb), Vahid Məhərrəmov
(hərbi jurnalist kimi tanınır), Tarverdi Abbasov, Eynulla Mütəllimov, Əli
bəy Azəri
QUBADLI – Rəşid Bərgüşadlı, Dostəli Nərimanoğlu, Hacı Nərimanoğ-lu, Şəfaqət Cavanşirzadə
LAÇIN – Fəxri Uğurlu, Şərif Ağayar, Təranə Vahid
Bayraq hekayələr toplusu
246
KƏLBƏCƏR – ŞUŞA –
AĞDAM – Aqil Abbas, Mustafa Çəmənli, Eyvaz Zeynalov, Nizami Ko-lanılı, Zaur Ustac, Sultan Mərzili
AĞCABƏDİ – Yaşar Süleymanlı, Eldar Qarqarçay
ZƏRDAB – KÜRDƏMİR –
GÖYÇAY – Anar, Pərviz Yəhyalı, Ülviyyə Tahir, Əfşan Yusifqızı (daha
çox şair kimi tanınır)
AĞSU –
AĞDAŞ – Xeyrəddin Qoca
UCAR – YEVLAX – BƏRDƏ – TƏRTƏR – NAFTALAN –
GORANBOY –
GƏNCƏ – Nüşabə Əsəd Məmmədli, Şəfa Vəli,
GÖYGÖL – Tofiq Əmrahov
SAMUX – DAŞKƏSƏN – ŞƏMKİR –
GƏDƏBƏY – Süleyman Abdulla (daha çox şair kimi tanınır), Qalib
Şəfahət, Pərvanə Bayramqızı, Ramiz İsmayıl (daha çox şair kimi tanınıb),
Xaliq Azadi (daha çox şair kimi tanınıb), Sabir Hüseynov, Hüseyn Məm-mədov, Zəka Vilayətoğlu
QAZAX – Natəvan Dəmirçioğlu
TOVUZ – AĞSTAFA –
ŞAMAXI – Elxan Elatlı, Yaşar Bünyad, Şiringül Musayeva
İSMAYILLI – Məmməd Mirzə, Hacıməmməd Məmmədov, Əvəz Küs-gün, Ülviyyə Niyazqızı, Zarina Əliyeva, Turac Hilal (daha çox şair kimi
tanınıb)
QƏBƏLƏ –
OĞUZ – Cəlil, Cavanşir, Vüsal Oğuz (daha çox şair kimi tanınır), Na-rıngül Nadir
ŞƏKİ – Ələsgər Davudoğlu, Vüqar Əmrah
QAX – ZAQATALA –
BALAKƏN – Vaqif Osmanov, Aygün Sadiq (daha çox şair kimi tanınıb)
MİNGƏÇEVİR – Svetlana Sultan Məcid, Zahid Qasımlı
NAXÇIVAN – Əlabbas Bağırov, Sadıq Qarayev, Aləm Kəngərli, Arif
Ağalar, Akif İmanlı, Hüseyn Əsgərov, Asif Kəngərli, Səfər Alışarlı, Güllü
Məmmədova, Həcər Paşayeva, Arzu Kazımqızı Nehrəmli, Mətanət Duyğu-lu (daha çox şair kimi tanınıb)
BAKI – Çingiz Abdullayev, İlqar Fəhmi, Nəriman Əbdülrəhmanlı, Ma-hir Qabiloğlu, Fərhad Əsgərov, Təranə Məmməd, Nazilə Gültac, Aysel Əli-zadə, Sevinc Nuriqızı, Gülnaz Abdullayeva, Kənan Hacı, Həmid Piriyev,
Ağasəf İmran, Elvin Rizvangil, Nemət Mətin, Nazlı Çələbi, İlahə İmanova.
Mənbə: Bayraq hekayələr toplusu
>>>> ƏN ÇOX OXUNAN HEKAYƏ <<<<
ZAUR USTACIN SATIŞDA OLAN KİTABLARI
“YAZARLAR” – SİFARİŞ ET
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
MƏN ZƏFƏRƏ TƏŞNƏYƏM
Qutlu zəfər sancağım,
Sancılmağa yer gəzir!
Alınası öcüm çox,
Bu gün ruhumu əzir!
* * *
Dərbəndi, Borçalını
Unuduruq həmişə…
Kərkük, Mosul bağrı qan,
Boyun əyib gərdişə…
* * *
Yudumun dörd bir yanın
Hürr görmək istəyirəm!
Şanlı zəfər tuğuma
Zər hörmək istəyirəm!
* * *
İrəvan peşkəş olub
Beş sətirlik kağızla…
Zəngəzuru naxələf
Verib quru ağızla…
* * *
Bədnam Araz illərdir
Olub qargış yiyəsi…
Top doğrayan qılıncın
O taydadır tiyəsi…
* * *
İstəyirəm bu bayraq
Dalğalansın Təbrizdə!
Urmuda üzsün balıq,
Sanki üzür dənizdə…
* * *
Xoyda, Mərənddə bir gün,
Olum qonaq üzü ağ.
Ərdəbilə, Tehrana
Qurulmasın ta duzaq…
* * *
Qarsdan, Ağrıdan baxım,
Qaşqayadək görünsün!
Qapıcıqdan, Qırxqıza
Ağ dumanlar sürünsün!
* * *
Bu arzular həyata
Keçməsə, mən heç nəyəm!
Neynim, mayam belədir,
Mən zəfərə təşnəyəm!!!
Müəllif: Zaur USTAC
“YAZARLAR” – SİFARİŞ ET
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
Dünya elə hiyləgərdi,
İti yal ilə aldadır.
Solu sağa möhtac edir,
Sağı sol ilə aldadır.
Fizulidən üzü bəri,
Səhra oldu eşqin yeri,
Gözəl qızlar şairləri
Qara xal ilə aldadır.
Kimə atdıq daşımızı,
Oynadıb göz-qaşımızı,
Arı sancır,başımızı
Şirin bal ilə aldadır.
Ya piyada,ya da atlı,
Getməlisən,bu həyatdı,
Şərab bizi bir saatlıq
“Xoşbəxt”hal ilə aldadır.
Bir ağ rəng var,bir də qara,
Çəkən bilir çəkir hara,
Şeytan bizi salır tora,
Şirin dil ilə aldadır.
Günlər keçir,quş qanadlı,
Biri dadsız,biri dadlı,
Ölüm bizi həyat adlı
Uzun yol ilə aldadır.
* * *
Qapılar
Niyə belə gec açılır
Bizə açılan qapılar.
Hərdən köhnə dərdimizə
Təzə açılan qapılar.
Gözləyirik yana-yana
Səbrimiz yetdikcə sona
Qırxa,əlliyə,doxsana
Yüzə açılan qapılar.
Heç bilmirsən nədir dərdi
Qovub namərd edir mərdi
Barmağın sayı qədərdi
Düzə açılan qapılar.
Kim öyrədib bu sənəti
Guya açılmağı çətin
Hər gün açılır xəlvəti
Naza açılan qapılar.
Əriyirik ilmə-ilmə
Oğulsansa gəl bükülmə
“Yuxarıdan”bircə kəlmə
Sözə açılan qapılar.
Səbr eyləyək deyə-deyə
Ah-naləmiz çıxdı göyə
Qalmayıb halal çörəyə
Duza açılan qapılar.
Niyə belə gec açılır
Bizə açılan qapılar.
Hərdən köhnə dərdimizə
Təzə açılan qapılar.
Müəllif: Yusif Mürsəl
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
Liman qəsəbə restoranında
(hekayə)
Cavanlar Liman qəsəbə restoranına yığışardılar. Payız, qış aylarında günortalar da, axşamtərəfi də. Özü də bayırda, yaşıllıqlar qoynunda. Qış aylarında isə restoranın zalında, yaxud da kabinetlərin birində bir yerə cəm olardılar. Üç bir, dörd bir, beş bir. Necə alınırdısa. İstidən xumarlanar, sifarişlərini verərdilər.
Hüseyn buralarda tez-tez görünərdi. Onun öz dost-tanışı vardı, onlarla restorana gələr, yeyib-içərdilər. Hüseyn İsabala kişinin oğlu idi. İsabalanı ətrafda, nəinki Boladi kəndində, rayonun başqa kəndlərində də yaxşı tanıyırdılar. Kəndin kolxoz sədri, kənd soveti sədri işləmişdi. Varlı-karlı adam idi.
Hüseyn atasının hesabına şən-qayğısız həyat sürür, pula pul demirdi. İsabalanın ölümündən sonra yenə eyş-işrət çəkməkdə bir xeyli problemi olmadı. Amma sabahını da fikirləşmədi, var-dövləti dağıtdı. Bir də ayılıb gördü ki, “bir həsidir, bir də Məmmədnəsir”. Var-dövlətdən, ata malından təkcə ikimərtəbəli ev, bir də üçtəkərli motosiklet qalıb. Yaxşı ki, bu motosiklet də alıbmış.
Əlqərəz, yayın isti günlərindən biri idi. Hüseyn evdə, həyət-bacada oturmaqdan bezib ayağa qalxdı. Bu istidə bir neçə parç pivə aləm olar, yanğısını söndürərdi. Odur ki, motosikletinə oturub Liman qəsəbə restoranına gəldi.
Dost-tanışları gözə dəymirdi. Pivə gətirdilər. Bu zaman Vaqif göründü. O, Hüseynlə salamlaşıb, restoranın bufetinə sarı getdi, əlini cibinə salıb:
-Bir qutu siqaret…
Bufetçi:
-Davıdov?
Vaqif:
-Hə, sarı rənglisi, – dedi.
Vaqif siqareti alıb çıxanda Hüseyn onu saxladı:
-Vaqif, qonağım ol.
Vaqif boyun-boğazının tərini silə-silə:
-Dəvətinə görə sağ ol, Hüseyn. Getməliyəm.
Hüseyn əl çəkmədi:
-Gedərsən. Bir parç pivə içsən, özünə gələrsən.
Vaqifin tərəddüd etdiyini görüb:
-Hesab mənlikdır.
Vafiq:
-Söhbət hesabdan getmir, doğrudan mənim işim var, – deyə yenə boyun qaçırdı.
Hüseyn qaş-qabağını tökdü:
-Sözümü yerə salırsan? Heç gözləməzdim.
Vaqif çar-naçar gəlib oturdu.
Cavanlar, elə başqaları da Hüseynin xətrini istəyirdilər. Vaqif onun xətrinə dəymədi, dəvətini qəbul etdi.
Hüseynin tək yeyib-içməkdən xoşu gəlmirdi. İndi dostlarının hərəsi bir yerdə idi, nə zaman gəlib-çıxacaqları bəlli deyildi. İndi Vaqif onun karına gəlmişdi. Onu buraxmaq fikri yox idi. Əli ilə xörəkpaylayanı çağırıb:
-Kişi üçün pivə gətir. Noxud da, balıq da ver.
-Baş üstə.
-Başın var olsun.
Vaqif pivəni içib qurtarmamışdı. Bir də gördü ki, stolun üstü salat, göy-göyərti, zeytun, manqal salatı, çoban salatı, pendir, limonad, qazlı su ilə dolub. Hüseyn elə hey sifariş verirdi:
-Deməli, yarım litr araq, nar şirəsi, lülə kabab, sonra tikə kabab gətirərsən.
Xörəkpaylayan baş endirib getmək istəyəndə Hüseyn onu saxladı:
-Arağı yarım litr demişdim. Onu 700 qramla əvəz edərsən…
Çöl-bayır istidən od tutub yanırdı. Onlar ağacın altında kölgəlikdə əyləşmişdilər. Deyir-gülür, zarafatlaşırdılar. Vaqif öz-özünə fikirləşdi: “Bir mənə bax, kişi qonaqlıq vermək istəyir, mən də yaxın gəlmirəm. Bu naz-nemətdən məhrum olacaqdım. Gedəcəkdim ki, nə var Dedi Qoduyevə bir arayış verməliyəm? Dedi gözləyər.
Qədəhlər bir-birinin ardınca dolub boşalır, badələr qaldırılıb sağlıqlar deyilirdi. Əvvəlcə Hüseynin, sonra Vaqifin sağlığına içdilər. Sonra başqa sağlıqlar deyildi. Onların Boladi kəndində yaşayan elə bir qohum-əqrəbası qalmadı ki, onun şəninə sağlıq deyilməsin. 700 qramlıq araq butulkası boşalmışdı. Hüseyn bir dənə də yarım litrlik gətirtdirdi. Onun da yarısını içdilər. Kefləri saz idi.
Əlqərəz, doyunca yeyib, doyunca içib ayağa qalxdılar. Vaqif keflənmişdi, ləngər vururdu.
Hüseyn motosikleti iş saldı. Onun işarəsi ilə Vaqif keçib motosikletin lülkasında yer tutdu.
Vaqif özündə-sözündə deyildi. Tezcə yuxuya getdi. Hüseyn:
-Vaqifin nə vecinə. Motosikleti yol polisi saxlasa, içkili olduğumu bilsə, atamı yandıracaq.
Motosiklet kənd yolunu yara-yara gedirdi. Qarşıya döngə çıxdı. Hüseyn güc-bəla ilə döndü. Vəziyyətdən çıxa bilməsəydi, qəza baş verəcəkdi.
Sükandan bərk-bərk yapışan, diqqəti yolda olan Hüseyn Vaqifə baxmadan, lakin ona müraciətlə:
-Görürsən? – dedi. -Oğulam ey. Gördün döngəni necə döndüm?
Vaqifdən səs çıxmadı. Hüseynin yadına düşdü: “Bu zalım oğlu sanki yüz ildir yuxusuzdur. Oturan kimi yatdı.
Vaqifin evinə çatmışdılar. Hüseyn sıçrayıb düşdü. Yenə də Vaqif tərəfə baxmadan:
-Şükür sağ-salamat gəlib çatdıq. İlişmədik.
Vaqif susurdu. Hüseyn dönüb baxdı. Təəccübdən donub baxdı. Nə lülka vardı, nə də Vaqif. Tez motosikletə oturdu. Bayaqkı döngəyə çatanda düşdü. Baxanda gördü nə? Motosikletin lülkası xəndəyə düşübmiş. Yaxşı ki, salamatçılıq idi. Vaqif lülkanın içərisində mışıl-mışıl yatmaqda idi. Sən demə, yüksək sürətlə motosikleti idarə edən Hüseyn döngəni dönəndə lülka qırılmış, Vaqiflə birgə gəlib xəndəyə düşmüşdü. Hüseyn qaynaqçının dalınca asıb-kəsdi:
-Verdiyim pul haramınız olsun. Gör motosikleti necə təmir ediblər, lülkanı motosikletə necə qaynaq ediblər ki, bir dönmə ilə lülka qopub xəndəyə yuvarlanıb.
Kənd camaatı yaxın gəlib əvvəlcə Vaqifi, sonra da lülkanı xəndəkdən çıxardılar.
Bakı şəhəri, 02 noyabr 2023-cü il
Müəllif: Akif ABBASOV
pedaqogika elmləri doktoru, professor, Əməkdar müəllim.
Mustafa Müseyiboğlu adına kitabxana
YAZARLAR.AZ
===============================================
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru
Mənim ürəyimdə həsrət böyüyür,
Gözümün yaşından içir bu həsrət.
Küləyə döyünür, yağışa düşür,
Dərədən, təpədən keçir bu həsrət.
Hayana gedirəm məni çağırır,
Səsə aldanıram körpə uşaq tək.
Bu yolun başında tənhalıq varsa
Xəyallar qurmağım nəyimə gərək?
Neçə qat qabıqdan çıxır bu ürək,
Hər qatın altından bir ilan çıxır.
Ay aman, bu boyda dərdin içində
Adamın adı da yadından çıxır.
Hələ ki, alovdan, hələ ki, oddan,
Hələ ki, göynəkdən keçir bu sevgi.
…Hələ arınıram sənsizliyimdə,
Hələ ki, ələkdən ķeçir bu sevgi.
* * *
Adam bu payızda ölə, İlahi,
Üstünü xəzəllə torpaqlayalar.
Vaxt gələ , yerində ağaclar bitə,
Sonra budaq -budaq yarpaqlayalar.
Təzədən doğasan bir ağac kimi,
Dünyanın səninlə işi olmaya.
Yanında hərlənə qurdlar , köpəklər,
Sənə batırmağa dişi olmaya.
Sakitcə dolana dünya başına,
Sən də ağac kimi durub baxasan .
Heç kim tanımaya bu baxışları,
Yiyəsiz baxasan, qərib baxasan.
Başına yığışa gəlib keçənlər,
Hamı kölgə uma ağac adamdan.
Təpədən dırnağa tərsiz, tumarsız,
Bu susuz adamdan, bu ac adamdan.
Günəş budağında çiçək toxuya,
Əl atıb gülündən öpələr sənin.
Dadın çıxarasan bu azadlığın–
Bu dağlar, dərələr, təpələr sənin.
Adam bu payızda ölə, İlahi,
Üstünü xəzəllə torpaqlayalar.
Vaxt gələ, yerində ağaclar bitə,
Sonra budaq-budaq yarpaqlayalar.
Müəllif: Təranə DƏMİR
Mustafa Müseyiboğlu adına kitabxana
<<<< WWW.YAZARLAR.AZ və WWW.USTAC.AZ >>>>
Əlaqə: Tel: (+994) 70-390-39-93 E-mail: zauryazar@mail.ru