05.10.2026-cı il tarixində Müəllimlər günü münasibəti ilə Bakı Reabilitasiya Mərkəzində oxucularla görüş keçirilib
Görüşdə Qabil Nabi ilə yanaşı gözəl şeirlər müəllifi Zirəddin Quliyev, tanınmış müğənni İsmayıl Rəcəbov, həvəskar müğənni Müşfiq Vəlizadə də iştirak edirdilər.
Tədbir iştirakçıları müəllimlərimiz haqda xoş sözlər deyib fikirlərini bildirdilər. Tədbir zamanl müxtəlif mövzulara aid şeirlər söylənildi, mahnılar ifa olundu, xəstə və həkim kollektinin sualları cavablandırıldı. Sonda oxuculara şairlərin imzası ilə kitablar təqdim olundu.
Mərkəzdə müalicə alan xəstələrin marağına səbəb olan bu tədbirin təşkilinə görə BRM-in baş həkimi Vüsalə xanıma, təşkilatçı Leyla xanıma, təşəbbüsçü Aida xanıma minnətdarlığımızı bildiririk.
“Yazarlar” olaraq, Qabil Nabini , Zirəddin Quliyevi və tədbirdə iştirak etmiş digər yaradıcı insanları təbrik edir, qarşıdakı bütün həyat və fəaliyyətində onlara yeni-yeni nailiyyətlər arzulayırıq! Uğurlarınız bol olsun!
Arzulama xoşbəxt olum, Xoşbəxtlik öz əlindədir, Düşüncəndə, fikrindədir. Arzulama cavan qalım, Cavan qalmaq asan deyil. Cavan qalsan ömür bitər, Arzuların sona yetər. Arzulama sən var-dövlət, Bil, düşünən beynin varsa, Görən gözün, vuran qəlbin — Budur nemət! Arzulama — arzu sözü fəlakətdir, Dəli kimi sevgini də arzulama. Sevgi bitər, göz yaşları qalar sənə… Düşün hər an, hər bir zaman: Ey Yaradan, xeyirlisi nəsib olsun, Yaradanın yaratdığı, xeyirlisi qismət olsun!
Şəhid qardaşım
Səhər-səhər qəbir üstə gəlmişəm, Günəş çıxır, mən də səni görmüşəm. Sən daş üstə mənə sakit baxırdın, Mən də sənə göz yaşımı axıtdım. Söylə sənə, bax, nə deyim, səslənim? Xoş səhərlər diləyim… Tək Sən idin, hər bir zaman gərəyim. Daş altında sakit yatana qurban, Günəş kimi səssiz batana qurban! Mən gəlmişəm, dur, salamla bacını, Mən içmişəm bu dünyada acını… Sən qardaşsız qoydun dörd bacını. Daş altında sakit yatan qardaşım Param-parça olubdur bu bacın. Mən həyata sənsiz cavab vermişəm, Bu imiş, bax, sənin bəxtsiz qədərin. İnan, sənin yolunu çox gözlədim, Daş altında sakit yatana qurban, Günəş kimi səssiz batana qurban!
Acıdərə sirlər saxlar
Acıdərə sirlər saxlayar, O dərədə adsız məzar gözləyər. Anasının qəlbi daşdır, O türk oğlu türkdür, qan yaddaşıdır. Ad yazmağa vaxt olmayıb, Türkün qəbri qalıb yadda. Sevir hamı, qardaş deyib baş əyirik, Sən canımız, qanımızsan! Yaddaşlarda qalacaqsan, Bütün şəhid bacısının qardaşısan. Ey türk oğlu, yol gözləyən ananı da unutmarıq, Rahat yatın, qisas aldıq, zəfər çaldıq!
Payız
Yay qurtarır ömür gedir, Durnalar da köçüb gedir, Yay fəsli sona yetir Bir də ömür dönməz geri. Gedən gedir hədər olur, Qocalırıq, baxışımız kədər olur, Yay qurtarır bir də geri dönəcəkmi? Gələn yayı bu Kifayət görəcək mi!? Yay qurtarır, payız gəlir Payız fəsli biraz fərqli Pıçıldaşan yarpaqlarda, Uçub gedən durnalarda, İnan dərdli, ayrılıqdan söhbət edər Hər gün bir az ömür gedər Biz sayırıq həftəmizi, Düşünmürük hədər olan günləri Bilmirik ki, qismətimiz necədir Zövq almırıq fəsilərdən, Ötüb gedən günlərdən.
MÜƏLLİMLƏRƏ EHTİRAMLA Həyatda hər zaman sevərək xatırladığımız özəl günlərdən biri də müəllimlərin bayramıdır. Məhz bu gün ömrünü Vətən övladlarının tərbiyə olunmasına, layiqli vətəndaş olaraq yetişməsinə həsr edən müəllimlərimizi qədirkeşliklə xatırlayırıq.
Müəllim cəmiyyətin əsas sütunudur, əyilməyən, sınmayan sütünü. Onlara ehtiram və sayğı ilə yanaşmaq hər birimizin mənəvi borcudur…
Müəllim əməyinin, mənəvi yükünün, fədakarlığının, məsuliyyətinin heç bir peşəylə müqayisəyə gəlmədiyini yaxşı bilirik. Zənnimcə, müəllim ailəsində doğulub, ilk tərbiyəni, öyüdü də valideynindən alanlar bu sənətin incəliklərini, pedaqoqların varlığında daşıdığı missiyanı, vərdişi daha yaxşı dərk edirlər…
Müəllim ailəsində doğulmuşam. Ocağımızda bu sənətin 3 nəfər daşıyıcısı olub: atam, anam, bir də ailəmizin ilk övladı bacım. Birgə vaxtlarımızda görmüşəm ki, onlar müəllim peşəsinin bütün əziyyətlərinə fədakarcasına qatlaşıblar. Sənətlərinə qəlbən, bütün varlıqları ilə bağlı olduqlarından məktəbi məbədgah, şagirdlərini öz övladları sanıblar…
Valideynlərim ailədə ilk tərbiyəçimiz, həm də həyat müəllimimiz olub. Ali varlığa xas olan bütün keyfiyyətləri bizə aşılayan, ictimai şüurumuzu formalaşdıran ilk növbədə valideynlərim olub. Həm ailədə, həm də məktəbdə müəllimlərimizdən əxz etdiklərimi ömür boyu yerində və qədərincə xərcləmişəm. Həyatda qazandığım uğurlarıma görə müəllimlərimə borcluyam…
Həmişə yeni dərs ili başlayanda, Müəllim günü qeyd olunanda valideynlərimi, bacımı xatırlayır və onların bu axının içində olmadığından qəribə bir nisgil, məyusluq hissi keçirirəm. Acı kədər varlığımı çulğayır. Amma bu çox çəkmir, tezcə də ürəyimə xoş bir hissin axdığını duyuram. Deyirəm, nə xoş ki şagirdləri hər zaman onları hörmətlə, məhəbbətlə xatırlayır, adlarını ehtiramla, böyük sevgiylə anırlar…
Bu gün müəllim adını şərəflə daşıyan, cəmiyyətin tərbiyəçisi olaraq ləyaqətli ömür yaşayan bütün pedaqoqları təbrik edirəm. Bayramınız mübarək, əziz müəllimlər!
