Fəsillər yarpaq tökür ömrün yol ayrıcında… Nə qışın oğlan çağı, nə də yayın istisi – Fərqi yox, sızmır daha kirpiyimin ucundan Nə Günəşin şüası, nə ocağın tüstüsü…
Orda atəşfəşandır… Göz oxşayır, nə gözəl! Fərqi yox, alovlanır cəhənnəm atəşindən… Fərqi yox, ovcumuzda ya yarpaqdı, ya xəzəl, Fərqi yox bu günün də, Fərqi yox keçmişin də…
Vaxtımız ləngər vurur ağır-ağır saatda, Əqrəblərin üstünə elə hey sual yağır: İlahi, görən nə var bu sonsuz kainatda Hər gün doğmaqdan çətin, hər gün batmaqdan ağır. Bakı, 26 yanvar 2024-cü il
Aşıb keçdim nə qədər sədd çıxsa da önümə, Ulu Yaradan yazıb mənim alın yazımı. Min şükür, ağrılardan sıyrılan bu günümə! – Bənövşəsi açılıb yetmişinci yazımın… Həmdəmim, dostum oldu bütün qəlbi sınıqlar, Öz yolumdan azmadım, – sevgi idi sarvanım! Min şükür, sındırmadı məni ağır sınaqlar, Min şükür, haqqa doğru gedir ömür karvanım… 07.03.2020.
Müəllif: Rafiq YUSİFOĞLU, şair, Əməkdar mədəniyyət işçisi, filologiya elmləri doktoru, professor.
Otuz üç yaş- Ömrün qərinəsi, Tale Günəşinin eyni nöqtəyə gəlməsidir… Şeytanın üsyan etməsi, Günah ağaclarının əkilməsidir. Otuz üç yaş- Ümid İsasının çarmıxa çəkilməsidir…
Otuz üç yaş- Bir az da düşünmək üçün, nəfəs dərmək vaxtıdır… Arzular süfrəsini Göydə sərmək vaxtıdır…
Yağsa da ömrümə illərin qarı, Həyatım ağaca, gülə oxşayır. – Hələ ürəyimdə neçə baharın Yolunu gözləyən qönçə yaşayır.
Dinclik tapa bilmir ürək bir hovur, Özünə sevgidən çələng toxuyur. Saçıma düşsə də ömrün qırovu, Qəlbimdə yaz qışa meydan oxuyur.
Üşüyə-üşüyə çiçək dərəndə, ”Sənə soyuq olar, yağışdır”, – demə. Gözlərim sevinir gözəl görəndə, ”Qocasan, özünü yığışdır”,– demə.
Günəş məhəbbətlə üzə güləndə, Dirçəlir, gül açır quru yamaclar. Cavanlar var deyə, bahar gələndə Çiçək açmasınmı qoca ağaclar?
ТЫ МЕНЯ НЕ СУДИ
Даже если на жизнь мою опали снега лет, Жизнь моя похожа на дерево, цветок. Еше в сердце, скольких весен Ожидая, бутоны живут.
Ни капли покоя не может наити сердце, Из любви себе венок плетет. Даже если волосы покрылись инеем, В душе весна бои ведет с зимои.
Когда, замерзая, рву цветы, «Ты простудишься, довольно», – не говори. Когда глаза мои радуются, красавицу видя, «Ты старик, довольно», – не говори.
Когда солнце с любовью улыбается в лицо, Оживают, расцветают голые склоны. Когда весна приходит, потому как молодые есть, Не должны цвести старые деревья?!
Перевела с азербайджанского Надежда Паина
Müəllif: Rafiq YUSİFOĞLU, şair, Əməkdar mədəniyyət işçisi, filologiya elmləri doktoru, professor.
6 mart 2024-cü il tarixində “Ədibin Evi”nin Azərbaycan Dəmir Yolları – ADY ilə birgə “Qatarda oxu” layihəsi üçün hazırladığı “Yağışlı bir gün idi…” adlı kitabın təqdimatı keçirildi.
Mir Cəlal adına III Hekayə Müsabiqəsinin qalibləri və münsiflər tərəfindən seçilən digər müəlliflərin hekayələr toplusu kitab şəklində nəşr edilərək oxucuların mühakiməsinə verilib. Kitab müsabiqənin münsiflər heyətinin sədri, xalq yazıçısı Elçinin ön sözü ilə 50-yə yaxın müəllifin hekayəsini daxil edir. “Ədibin Evi”nin təşəbbüsü ilə TEAS Press tərəfindən hazırlanan “Yağışlı Bir Gün idi…” adlı kitab “Azərbaycan Dəmir Yolları” QSC-nin sifarişidir – “Qatarda oxu” layihəsi çərçivəsində səyahət zamanı ADY sərnişinlərinin qiraəti üçün qatarlarda təqdim ediləcək.
Yeni nəşrin təqdimatı tanınmış yazıçı, ədəbiyyatşünas və tənqidçilərin iştirakı ilə Azərbaycan Dəmiryol Muzeyində baş tutub.
“Ədibin Evi” Ədəbiyyata Dəstək Fondunun icraçı direktoru Şəfəq Mehrəliyeva iştirakçıları İçərişəhərdəki Mir Cəlal ocağının həmtəsisçiləri adından salamlayıb. Bildirib ki, Fondun məqsədi Azərbaycan ədəbiyyatının tədqiq və təbliği ilə bağlı fəaliyyət qurmaqdır. Burada 2017-ci ildən bəri keçirilən və Azərbaycan ədəbiyyatında qısa hekayəçilik irsini qoruyan Mir Cəlal adına Hekayə Müsabiqəsi ənənəvi hal alıb. BDU-nun professoru Ədibə Paşayevanın ötənilki təklifi ilə münsiflər bu dəfə yalnız qaliblərin elan edilməsi ilə kifayətlənməyib, seçilmiş əsərləri müasir Azərbaycan ədəbiyyatına bir töhfə kimi kitab şəklində hazırlmağa qərar veriblər.
Daha sonra tədbirdə çıxış edən Azərbaycan Dillər Universitetinin müəllimi Qismət Rüstəmov dəmir yolu sənayesinin inkişafının ədəbi janra gətirdiyi yeniliklər barədə bəhs edib.
Əməkdar memar Akif Abdullayev isə təqdimatın keçirildiyi Sabunçu Vağzalının tarixi binası və onun təyinatı barədə xatirələrini auditoriya ilə bölüşüb.
Müsiflər heyətinin üzvləri xalq şairi Nəriman Həsənzadə, tanınmış sənətşünas İlham Rəhimli və Mir Cəlal adına III Hekayə Müsabiqəsinin qalibi Seymur Oruc yazıçıları hekayələrinin işıq üzü görməsi münasibətilə təbrik edib, Azərbaycan dilinin paklığının qorunması istiqamətində onlara nailiyyətlər arzulayıblar.
Təqdimat mərasimini yekunlaşdıran ADY sədrinin müşaviri Aysel Soltanova qeyd edib ki, 2019-cu ildə Prezident İlham Əliyevin iştirakı ilə açılan Azərbaycan Dəmiryol Muzeyi pandemiya səbəbindən uzun müddət bağlı qalsa da, ötən ilin dekabr ayında ziyarətçilərin üzünə açılıb, bundan sonra həm də belə mədəni tədbirlərə ev sahibliyi edəcək. “Ədibin Evi”nin kitab ideyasına həvəslə qoşulan ADY bu nəşri eksklüziv olaraq qatarlarda sərnişinlərin səyahət vaxtının daha mənalı və xoş keçməsi üçün təqdim edəcək.
Təqdimat mərasimində gənc istedad, Sumqayıt şəhər Bülbül adına 2 saylı Uşaq İncəsənət məktəbinin şagirdi Nuray Şahsuvarlı Beynəlxalq Muğam Mərkəzinin ifaçılarının müşaiyəti ilə musiqi nömrələri ifa edib. Tədbirdən fotolar:
Qeyd:
Tədbirin gedişində bütün iştirakçılara əvvəlcədən nəzərdə tutulmuş qaydada “Yağışlı bir gün idi…” kitabı xüsusi hazırlanmış heybələrdə hədiyyə olunub. Eyni zamanda təşkilatçılara “Ziyadar” mükafatı təqdim edilib.
